Hoërskool Carletonville wens met trots Lerato Lesenyego (Graad 8D) hartlik geluk met haar uitstekende prestasies in gholf.
Lerato verteenwoordig Sentraal-Gauteng sowel as Suid-Afrikaanse Kindergholf, waar sy steeds uitsonderlike talent en toewyding op nasionale vlak ten toon stel. Gedurende 2025 het sy deelgeneem aan die gesogte Delta Junior Africa Challenge, wat in April by die Stanbic Gholfklub in Botswana gehou is.
Lerato het teen 170 spelers van 7 verskillende lande meegeding en ‘n buitengewone eerste plek algeheel behaal – ‘n merkwaardige prestasie wat haar dissipline, vasberadenheid en vaardigheid weerspieël. Deur haar oorwinning het sy gekwalifiseer om in Ierland mee te ding. Ongelukkig kon sy weens finansiële beperkings nie in Julie deelneem nie. Hulle bly egter hoopvol en sien uit na haar deelname aan die Botswana-toernooi weer hierdie April.
Daarbenewens het Lerato deelgeneem aan ‘n SA Kindergholftoernooi by die Krugersdorp Country Club, waar sy ‘n uitstekende 86 aangeteken het en die eerste plek verseker het.
